D' Segment ass 130 X 72 cm grouss. E besteet um Niveau 0 aus engem Haaptgleis a 4 Ofstellgleisen. D'Radie sinn 39,5 cm an 43 cm.  D'Gleise gi provisoresch opgeluegt an agezeechent. 6 Leitunge vun 1,5 mm gi mat Brawa Steckerklemmen 3093 an de Segment verluegt. 2 si fir Fuerstroum (14 V DC), 2 fir Schaltstroum (16 V AC)  an 2 Leitunge  mat 14 V DC si fir Geliits an Animatiounsdeeler. Eng wäiss MDF Plack vun 3 mm gëtt fir d'Stellpult agebaut.

Ofschnëtter ouni Stroum gi mat Plastikseclissen an Eclissen mat ugeléitene Kabelen equipéiert. D'Stellpultelementer vu Fleischmann ginn op d'MDF Plack geschrauft. D'Säitendeeler vum Segment gi matt Wäissläim a Serre-Jointen festgemaach. Déi horizontal Läischte ginn eenzel op d'Mooss geseet. Duerno gi se mat Schrauwen a Wäissläim agesat. D'Späerholzplack fir deen ieweschte Niveau gëtt geschnidden an opgeluegt.

Déi am Ufank agebauten Heljan Brauerei N 678 hunn ech 2023 duerch selwer gebaute Gebaier ersat. Fensteren an Diere zesumme mat Placke vu bal alle Marke goufe gebraucht. Eng Rumm vun 3,5 mm Héicht ëmschléisst d'Brauerei. Si soll dat versenkte Gleis am Haff ophuelen. E klengt Verwaltungshaus gouf no Fotoe gebaut.  Am Agank vun der Brauerei gouf eng Paart agebaut. Ech hunn de bewegleche Waasserkran 5832 vu Viessmann benotzt. Dëse gouf zerseet a versenkt agebaut.

E Viessmann Powermodul 5215 gouf un de Fleischmann Trafo 6705 ugeschloss. D'Paart gëtt mat Tasteschaltere gesteiert. Parallel dozou schalt e Viessmann Relais 5551 d'Andreaskräizer 5803 fir de Brauereishaff an ënnerbrécht de Fuerstroum wann d'Paart zou ass. Nodréiglech hunn ech eng Trennstell mat der Rocossee ageriicht. Si gëtt iwwer eng Fleischmann Eclisse  22217 mat Stroum versuergt. Eent vun den Andreaskräizer hänkt  un engem 2 mm Messingmast.

D'Brauereipaart gouf aus Placke vu Busch, Profile vun Evergreen an 0,8 mm Messingstaange gebastelt. De Viessmann Waasserkran 5832 hunn ech ofgeschnidden an e klengt Lach an de Sockel gebuert. D'Paart gouf mat Sekonneläim am Gel agepecht. D'Mauer mat dem Mechanismus vun der Paart gëtt einfach op e Profil opgesat. D'Kibri Mauerplacken 37969 goufe mat Humbrol Lackfaarwen ugestrach. No der Drëchnung koum waasserléislech gro Plakafaarf 72 drop a gouf an d'Fouen geriwwen.

Virun d'Brauereipaart hunn ech en ëmgebauten Zwergsignal vu Mafen agebaut. D'Signal ass mam Relais verbonnen, deen d'Paart, d'Andreaskräizer an de Fuerstroum steiert. Hannen am Brauereishaff koum en Entkuppler bäi. Aus Faller Deeler, Placken a Läischte vu ville Marken gouf en Dieseltank mat Ausfëllstatioun fir en Tankwagon gebaut. Eng Luucht an eng Zapsail vu Modellbahn Union hunn ech och agebaut.

D'Brauerei kritt de Masutt fir ze brauen an den Diesel fir hir Camionen iwwert de Schinnewee geliwwert. All d'Brauereigebaier kruten LED Beliichtung agebaut. Baussen, iwwert den Diren, koumen Modellbahn-Union Luuchten. Ënnert den Daach vum Luedequai hunn ech eng wäiss LED agebaut. De Kibri Kamäin gouf vun ënnen opgebuert a gefeilt. E Seuthe Dampgenerator hunn ech uewen agebaut. Mat engem Drocktaster start e Kemo Zäitschalter an de Kamäin dämpt 20 Sekonne laang.

Den Atelier fir d'Camionen hunn ech aus Plastiksdeeler vu Busch, Evergreen a Kibri gebastelt. D'Ariichtunge si vu Modellbahn Union. De Stull an d'Masuttsiewe si selwer gebastelt. Bannen ass eng wäiss LED agebaut. D'Luucht iwwer der Dir vum Büro ass vun der Modellbahn Union. D'Gelänner vun der Trap gouf aus 0,3 mm Drot gebéit a mat Sekonneläim am Gel zesummegepecht. D'Lëftungstübe vum Atelier sinn aus engem Rouer an ofgeseete Messingsneel fabrizéiert.

De Fatima Sanctuaire hunn ech mat Hëllef vu Fotoen gebastelt. D'Béi goufen aus enger Holzläischt vu 4 mm gefeilt. D'Fatima selwer ass eng ausgeschnidde Foto, déi op eng gro Plasiksplack gepecht ass. D'Placke si vu Kibri a vu Busch. D'Profile si vun Evergreen an d'Faarwe vun Humbrol. Als Gelänner huelen ech Leederen vu Vapeur 70 an Heljan. De Sanctuaire gëtt vun 2 Scheinwerfere beliicht.

De Lokomotiveschapp hunn ech no Fotoe gebaut. D'Wänn mat den Diren an de Fënstere goufen op Millimeterpapeier gezeechent. De Plang gouf mat Pauspapeier op eng  Busch Plack 7203 iwwerdroen.Mam Cutter gouf alles ausgeschnidden. Den Daach besteet aus Kibri Schieferplacken. D'Lëftungstübe goufen aus engem Rouer an ofgeseete Messingsneel fabrizéiert. D'Kulange sinn Evergreen Half Round Profilen. D'Oflossréier hunn ech  aus Drot vun 1 mm gebéit. Si goufe mat Sekonneläim fixéiert. Duerno kruten se en Ustrach mat Humbrol Sëlwerlack.

Inspiréiert vun enger aler Foto hunn ech e Waassertuerm gebaut. D'Dimensiounen goufen un de Schapp an un d' Brauerei ugepasst. Den Tuerm hunn ech no menger gewunnter Manéier gebastelt. Hie krut eng Leeder vu Ratio an eng Luucht vu Viessmann. Mat dem Computer hunn ech eng Jauge, Schelter a Plakater gezeechnet wäiss Folien erausgedréckt.

Niewend de Footballsterrain koum eng Buvette mat Keess an Toiletten. D'Gebai gouf, wéi schonns beschriwwen, gebastelt. Ech hunn eng Beliichtung mat LED installéiert. Den Daach kann een erofhuelen. Dann hunn ech eng 3 mm MDF Plack fir d'Strooss a fir d'Gradinen vum Terrain mat der Stéchsee geschnidden. Ech hunn och 2 Paarten, eng Resultatstafel, Hecken an Drotzonke fabrizéiert. Op d'Landschaftsstrukturen aus Holz gouf Drotfilet vu Noch mat der Kliefpistoul gekollt. Drop koume Gipsbandagen.

D'Fielse si gesammelt Schiefersteng. Ech hu mat Mastik alles fäerdeg modelléiert. Hannert der Brauerei gouf e Gelänner aus dem Schëffsmodellbau agebaut. D'Luuchte sinn aus 2 mm Messing H Profilen a Viessmann Deeler. D'Wisen hunn ech mat Heki Decovlieβ, Materialien vu Woodland, Busch a Wäissläim gemaach. D'Beem si vu Faller, Heki, Hünerbein Natur a Busch. D'Stroosse si mat Faller Farf ugestrach.

E Viessmann Soundmodul gouf mat engem Relais paralell zur Paart geschalt. An d'Fosse vun der Garage koum eng Schweessluucht vu Busch. Ënnert de Futtballsterrain hunn ech e programméierbare Soundbausteen vu WayinTop installéiert. Den Zonk beim Lokomotiveschapp ass vun Ndetail. D'Schëlter si selwer aus 0,3 mm Drot, 0,3mm Plasiksplacken an Decalle fabrizéiert. De Prellbock ass vu Weinert. Niewend dem Stompgleis fir op Baastneech hunn ech en Ubau fir entgleisten Zich fixéiert.

D'Brauerei krut e weidere Luedequai fir Camionen. D'Messingleederen aus dem Faller 222195 Kit goufe gebéit, gefierft an ugepecht. Hannert d'Garage hunn ech en Ënnerstand un d'Mauer fixéiert. An d'Näertrenger Stross goufe Schëlter an e Kilometersteen installéiert. De Futballsterrain bastelen ech aus Plastiksplacken a Messingsdeeler. D'Strecher goufen mam Plotter geschnidden. Eng Oxford Ambulanz mat Blénkluucht hunn ech bei Letitlight zu Rastatt bestallt a mat Decalen ëmdekoréiert.

Virun d'Brauerei koum e Faller Velosstänner. An d'Herpa Remorquen hunn ech N-train Säck gepecht. D'Eisebunns- a Stroosseschelter si selwer gemaach. D'Viessmann Andreaskräiz gouf liicht versenkt agebaut. D'Schaaschtechmettie si vu Noch. Fir op de Futtballsterrain hunnn ech Goaler aus Messingsdrot a Fänkfileten aus 1,5 mm Evergreen H-Profilen an Drotfilet fabrizéiert. Ronderem den Terrain koum en ëmgeännerten an ugestrachenen Zonk vun Aeronaut.

Ech hunn 2 Plexiglasplacken als Protektioun un de Rand vum Terrain ugeschrauft. D'Reklamenpanneauen goufen ugepecht. En Tableau, deen de Spillstand vum Match weist, hunn ech gebastelt an opgestallt. D'Brawa Scheinwerfer goufen duerch Evergreen Sträifen, Kestrel Leederen an Deeler aus 0,3 mm an 0,5 mm Drot ergänzt. 

Ech hu Beem vun Heki an Zonke vun Ndetail rodrëm de Futballsterrain agesat. En Haische fir de Waachhond bei der Garage koum derbäi. Fir de Wanter an der Biergstrooss hunn ech eng Sandkëscht an eng Schnéischepp aus Ndetail Deeler, Drot a Plastiksplacke gebastelt. Op de Fiels hannert der Brauerei goufen e Gelänner an e Photograph installéiert. Ech hunn den amerikanesche Poliziste vu Woodland d'Kapen ofgeschnidden, Evergreen Ronnprofilen opgepecht a mat Humbrol Faarf ugestrach.

Lo gehéiren si zur "Gendarmerie Grand-Ducale" a passe bei den emdekoreierten Oxford Land-Rover. Bei d'Buvette goufen e Gelänner an Dreckskiwwelen gepecht. Sanitäter vu Noch a Preiser këmmeren sech em eng Persoun déi eng Attaque kritt huet. D'Footballsupportere sinn aus de Woodland A2187 Streikposten entstanen. D'Autoe goufe mat Decallen verännert.

D'Futtballspiller si vu Noch a vun Tomytec. D'Nochspiller krute schwaarz Sträifen a wäiss a rout Nummeren. Et sinn Decale vu Microscale. Ech hunn 3 Figure vun Tomytec beim Bauch duerchgeschnidden. Si goufen ëm ongeféier 1,5 mm verkierzt, zesummegepecht an ugestrach. Lo passen si an der Gréisst besser bei déi aner Männercher. Dem Linieriichter hunn ech e Fändel aus gielem Stoff an aus Drot fabrizéiert.

Hannert dem Futtballsterrain goufe Beem vu Faller opgestallt. En Hiirt mat Schof an e Soundmodul hunn ech an de Bierg agebaut. E Bam mat enger Bänk koum niewend d'Strooss. Ënnert d'Camionssgarage hunn ech Baustäng mat Geräischer installéiert. Eng Camionsdépanneuse vun Artitec a Figure vu Woodland koumen an den Haff.

Op dem alen Deel vum Reseau goufe Verännerunge virgeholl. Op dem Segment mat der Gare hunn ech de Faller Quaikran motoriséiert. Niewend dem Gidderschapp hunn ech eng Camionswo aus Placken a Profile gebastelt. De Sherman Tank gouf duerch en Artitec Modell ersat.

D'Weichenhiewelen, de Kilometersteen an den Telefon goufen aus Placken, Ronnnprofilen, Läischten an 0,3 mm Drot gebastelt. Si goufe mat Decalen a mat Humbrol Faarwen dekoréiert. Ech hunn nei Prellbëck vun Auhagen agebaut. An der Mëtt vun der Barrière goufen Evergreen Läischten agepecht a mat Humbrol Faarwen ugestrach.

Och hei goufe Verbessungen gemaach. Eng Spärholzplack fir eng kleng Spillplaz hunn ech mat Schrauwe fixéiert.  En ëmgeännert Kannerkarussell vu Langley gëtt vun engem ONPIRA Motor TDY-12 mat 2,5 Ëmdréiunge pro Minutt ugedriwwen. Eng Viessmann H0 Klunsch hunn ech ëmgebaut an zum Deel versenkt agesat.

Fir de Park mat der Spillplaz hunn ech eng öffentlech Toilette no der bekannter Method gebastelt. Virun der Villa goufen di al Luuchten duerch Beli-Beco Artikelen ersat. D'Stroosseluuchten an der Haaptstrooss goufen duerch Faller Artikelen mat LED ersat. Aus dem Viessmann Buer gouf mat Evergreen, Faller a Noch Elementer e Michel Rodange Renertbuer fabrizéiert. Decalen hunn ech entworf a gedréckt. Alles gouf mat Holzschrauwen a Rummen aus Holzläischten festgemaach.

Ech hunn 2 WayinTop Soundmoduler fir 4,5 V agebaut. Fir d'Spillplaz hunn ech e gratis Internet Download gelueden an op 6,7 MB mp3 am Sound Forge gekierzt. Fir de Buer gouf an engem noe Park Waassergeräisch opgeholl an op ongeféier 3 Minutten Dauer mp3 am Sound Forge beschafft. D'Kneppecher hunn ech virun di visuell Szenen agebaut. D'Baustäng kënnen ausgebaut an ëmprogramméiert ginn.

D'Kibri Buerg hunn ech ausgebaut. De Segment gouf mat Läischten a Spärholzplacken no uewe verlängert. Ënnert d'Schlass hunn ech e weideren ONPIRA Motor TDY-12 fir d'Kiermesuergel agebaut. Dës gouf aus engem Lemke Unhänger, Plastiksplacken an Deeler vun Evergreen esouwéi Auhagen gebastelt.D'Frontdekoratioun hunn ech am Adobe Illustrator entworf an op en Decal mat Laser gedrockt. Eng Figur vu Noch dréit op enger Messingschrauf vun 1 mm. E Soundmodul vu Noch suergt provisorësch fir Musek. 

De Kibri Bausaz hunn ech ëmgebaut. Banne koumen 2 Metallstaange vun 8 mm an déi 6 Kabele fir de Stroum vum ganze Reseau. Wéinst der Déift vun dem Faller Car System  sénge Schaltelementer hunn ech d' Héicht vun de Stäipen an d'Déckt vun der Strooss missen duerch Tester ermëttelen. D'Niveauen vum Floss, der Strooss, der Bunn an der Steebrochsbunn konnt ech esou op 18, 58, 90 an 200 mm festleeën. Den Hang vum Bierg gëtt dorunner ugepasst. Den Tunnel hunn ech aus Reschtstécker no Virlag vun enger Foto gebaut.

Den Tunnel hunn ech aus Reschtstécker no Virlag vun enger Foto gebaut. Am Tunnel goufen d'Fleischmann Schinnen mat dënne Placken ënnerluegt, fir op d'Héicht vum Peco Code 55 Gleis op 3mm Kork ze kommen. Eclisse mat Kabelen solle fir Stroum suergen. Eng Ënnerfeirung fir e Feldwee, no emgem Virbild bei Béislek, hunn ech och gebaut. D'Maueren goufe  wéi ëmmer mat Humbrol Lackfaarwen ugestrach. Duerno hunn ech mat groer Plaka Waasserfaarf getuppt a geriwwen.

Ënnert d'Bréck hunn ech eng 0,25 mm Plastiksplack gepecht. Aus Späerholzstécker goufen Bierger, Häng, de Kanal an d'Wier fir d'Waassermille gebastelt. D'Peco Gleis an d'Korkbettung hunn ech mat Humbrol Lackfaarwen ugestrach. Mat Peco Metallasäz gëtt d'Gleis geluegt a mat waasserfestem Laim ugepecht. Peco PL-82 Eclisse mat Kabele suerge fir Stroum. Duereno hunn ech mat Heki 33103 geschottert.

Déi ënnerierdesch Kéierschläif vum FCS bauen ech op eng 12 mm Spärrholzplack, déi ee spéider no uewen eraushuele kann. Si gëtt mat 2 Mudddere festgemaacht. De Faller Trafo 180641 hunn ech vedéift agebaut. 2 elektrësch Faller Parkplazen 161674 gi mat 4 Busch Liichbarrièren 5720 an 2 Busch Elektronik Relaisen 5740 gesteiert. Iwwert d'Kéierschläif vum FCS bauen ech en amovible Bierg aus 6 mm Spärholzplacken.

D'Biergstrooss hëllt en Kéier a verschwënnt no enger géier Descente ënnert der Gare. Eng weider Faller Parkplaz 161674, gesteiert vu Reflexionsliichtbarrieren vu Reinholdschmitz an engem Rocorelais erlaabt et 2 Camionen ofwiésselnd fueren ze loossen. D'"Camionsstrooss" soll um Steebrochsegment erëmm visibel ginn a vun do bei de Concasseur féieren.

D'Peco Code 55 Flexgleis hunn ech dës Kéier no der Method vum Peco TV Film verluegt. Eng 3 mm Korkplack gouf mat Humbrol Lack gro ugestrach. D'Gleis hunn ech mat enger 36 Zoll Schabloun gebéit. Baussen an d'Schwellen hunn ech a regelméissegen Ofstän zwee 0,5 mm Lächer gebuert. Spur Z Neel goufe mat enger Zaang agedréckt. Un all Flexgleis hunn ech ënnert d'Schinnen 2 Kabele geléit. Peco PL-82 Eclisse suergen och nach fir Stroum.

De Gleisplang besteet aus 2 Bouweichen SL-E386F,SL-E387F an 2 riite Weichen SL-U395F an SL-U396F. Ënnert der Plack verleeft  d'FCS Camionsstrooss. Vir laanscht féiert d'FCS Paradestrooss. Den Drot hunn ech mat der Faller 161669 Rillefräs verluegt. D'Strooss ass aus 4 mm Pappelspäerholz. D'Eisebunnsweiche gi mat  PL-26W "Passing Contact Switch" Schaltere gestallt, déi a PL-28 Rummme fixéiert sinn. Esou gesäit een hir Stellung ëmmer um Schaltpult.

Ënnert all Weichen hunn ech PL-10 Motore mat PL-15 Twin Microswitch Schaltere festgemaacht. De PL-15 versuergt d' Weichenhäerzstéck mat Stroum. Och eng Stoppfunktioun bei falsch geluegter Weich gëtt iwwert de PL-15 geschalt. Op 4 Plazen hunn ech Schalteren an d'Pult agebaut, fir Zich unzehalen. Fir d'Lokomotiv vun de Wagonen ze trennen, hunn ech zousätzlech un dem Herkat Entkuppler en  Hiewel agebaut. Esou kann een och mat "Gefill" vun Hand lasskrämpen, ouni datt alles wackelt.

D'Stellwierk "Schlesserbierg" hunn ech op Basis vu Faller mat allméiglechen Deeler vu Kibri, Evergreen, Modellbahn-Union an Drot gebastelt. D'Gebai vum "Chef de service" huet seng Uerspreng an engem Artitec Kit. D'Gardehäischen ass eng eege Konstructuioun mat Deeler vun alle Marken. D'Barriereskierb ass vun Nordmodell and d'Lautwierk vu JPP. D'Weichelanteren an Deeler vu mechanëschen Stellwierk stame vu Weinert.

D'Landschaft gëtt vun enger Baachmündung bestëmmt. De Concasseur an d'Steebrochsbunn kommen op d'Nordufer vun der "Himmelsbaach". D'Kéierschläif vun der FCS Paradestrooss kritt  eng Faller 161674 Parkplaz. Si gëtt vun 2 Reinhold Schmitz RLSAC
"Reflexionslichtschranken" an engem Viessmann Universal Relais 5551 gesteiert.

D'Steebrochsbunn ass um Busch H0f System opgebaut. Am 1/160 entsprécht dat ongeféier enger Meterspuerbunn. Si pendelt iwwer eng Opfaart aus Märklin Z Bréckendeeler, déi op Vollmer N Piliere leien, bis an de Concasseur an erëm zeréck. Iwwert eng Weich féiert d'Bunn op enger reng dekorativer Bréck no vir. Dëst ass geduecht fir d' Camionsstrooss vum Faller Car System  ze verstoppen.

De Concasseur bauen ech aus Plastiksplacke vu Busch, Kibri a Vollmer. Deeler vu Cornerstone a Kibri Bausätz, esou wéi Evergreen Profiler, ginn och verschafft. Dat ganzt Gebai léisst sech no uewen eraushiewen. D'FCS Camione ginn duerch eng 161674 Parkplaz ugehalen an duerch en Drockknäeppche gestart. D'Landschaft hannendrun kann een deelweis eraushulen, fir un di ënnerierdësch Strooss ze kommen.

De Kaméidi vun engem Steebroch hunn ech mam Handy opgeholl. Am mp3 Format ginn d'Geräischer op en Uhlenbrock Tounbausteen 38110 iwwerdroen. De Modul gëtt duerch e Schalter aktivéiert. D'Gleiser vun der Steebrochsbunn si Busch H0f Artikelen, bei deenen ech tëschent de bestoënde Schwellen ëmmer eng derbäi bastelen. Dës besteet aus Evergreen Deeler.

Op der Zoufaart an am Concasseur hunn ech d'Schinne vu Busch mat Balsaholzsträife verkleet.  De Klangmodul vun Uhlenbrock passt just an de Concasseur.Säitlech hunn ech un de Concasseur en Ubau mat Mauerplacke gebaut. E Gleisspäersignal vu Viessmann soll d'Beluede vun de Waggone steieren. Eng Gleiswo hunn ech aus engem Auhagen Kit gebaut. Um Daach ass e bewegleche roude Guidon. E Verwaltungsgebai an eng Camionswo hunn ech neess selwer gebastelt.

Niewend der amovibler Bréck stinn de "Café Op der Millen" an dat fréiert Stallgebai. Ech hunn Deeler vu Faller, Uhlenbrock, N-train, Kibri, Evergreen, Peco, Weinert, Mafen a Beli-Beco verbaut. De Noch 21769 Bam mat beweglecher Schaukel gëtt och agebaut.